సుహృద్భావ పర్యటనలో భాగంగా మూడు చైనా సైనిక నావలు ప్రస్తుతం క్యూబా తీరానికి చేరాయి. రెండు దేశాల మధ్య దౌత్య సంబంధాలు ఏర్పడి యాభై ఐదవ వార్షికోత్సవం సందర్బంగా ఈ పర్యటన జరుగుతోంది. మంగళవారం నుంచి ఐదు రోజుల పాటు క్యూబా తీరంలో చైనా నావలు లంగరు వేస్తాయి.ఈ సందర్బంగా అనేక కార్యక్రమాలను ఏర్పాటు చేశారు.ఆధునిక చైనా క్షిపణి విధ్వంసక నౌకలలో ఒకటైన జియాన్‌ వీటిలో ఒకటి. అట్లాంటిక్‌ సముద్రంలో అమెరికా నావికా దళంతో కలసి తొలి సంయుక్త నౌకా విన్యాసాలు జరిపిన తరువాత చైనా నౌకలు క్యూబా వచ్చాయి.

దక్షిణ చైనా సముద్రంలో చైనాకు చెందిన దీవులపై వివాదానికి దిగిన అమెరికా ఆ ప్రాంతంలో వుద్రిక్తతలను రెచ్చగొడుతున్న పూర్వరంగంలో చైనా నౌకల రాకు ప్రాధాన్యత ఏర్పడింది. కరీబియన్‌ జలాల్లోకి చైనా నౌకలు ప్రవేశించటం ఇదే తొలిసారి. తిరుగు ప్రయాణంలో పనామా కాలువ ద్వారా ప్రయణించి మార్గమధ్యలోని మెక్సికో ఇతర ప్రాంతాలను కూడా ఈ నౌకలు మర్యాదపూర్వకంగా సందర్శిస్తాయి.

గతనెల 27న అమెరికా యుద్ధ నౌక యుఎస్‌ఎస్‌ లాసెన్‌ దక్షిణ చైనా సముద్రంలోని చైనా దీవులకు సమీపంలో లంగరు వేసింది. దీనిపై చైనా నౌకదళం హెచ్చరికలు చేయటంతో తాము అంతర్జాతీయ జలాల్లో మాత్రమే వున్నామని తమ హక్కును వినియోగించుకుంటున్నామని అమెరికా చెప్పింది. సాధారణంగా జరిపే పర్యటన అని చెప్పినప్పటికీ అంతర్జాతీయ చట్టాలు అనుమతించినంత వరకు తాము దక్షిణ చైనా సముద్రంతో సహా ఎక్కడకైనా వెళ్లగలమని ప్రపంచానికి ముఖ్యంగా చైనాకు హెచ్చరిక చేయటమే ఈ చర్య లక్ష్యం. దీనికి ప్రతిగా మా ఇల్లు మీకెంత దూరమో మీ ఇల్లు కూడా మాకు అంతే దూరం జాగ్రత్త అంటున్న చైనా తన బలాన్ని కూడా ప్రదర్శించింది.

నిజానికి దక్షిణ చైనా సముద్రంలోని స్పార్టలే దీవులతో అమెరికాకు ఎటువంటి సంబంధం లేదు, గతంలో వాటిని ఆక్రమించుకున్న జపాన్‌, ఫిలిప్పైన్స్‌ మరికొన్ని దేశాలు తమవే అంటున్నాయి. జపాన్‌, ఫిలిప్పైన్స్‌తో వున్న రక్షణ ఒప్పందాలను సాకుగా తీసుకొని వాటికి సాయం చేసే పేరుతో ఆప్రాంతంలో అమెరికా బల ప్రదర్శనకు దిగుతోంది.