పోర్చుగీసులో పదిరోజుల క్రితం అధికారానికి వచ్చిన మితవాద మైనారిటీ ప్రభుత్వం మంగళవారం నాడు రాజీనామా చేసింది. త్వరలో సోషలిస్టులు, కమ్యూనిస్టు పార్టీ, వామపక్ష సంకీర్ణ ప్రభుత్వ ఏర్పాటు కానుంది. మితవాద ప్రభుత్వ విధానాలను పార్లమెంట్‌ తిరస్కరించటంతో ఈ నాటకీయ పరిణామం సంభవించింది. తమ షరతులను అంగీకరించాలన్న యూరో దేశాలు ఈ పరిణామాన్ని జాగ్రత్తగా పరిశీలిస్తున్నాయి. పొదుపు చర్యలనుంచి( ప్రజలపై భారాలు, ప్రభుత్వం సేవల బాధ్యతల నుంచి వైదొలగటం) వైదొలిగితే నూతన ప్రభుత్వానికి ఇబ్బందులు తప్పవని హెచ్చరిస్తున్నాయి. ఈ పరిణామాల పూర్వరంగంలో డిసెంబరు 20న జరిగే స్పెయిన్‌ ఎన్నికల ఫలితాలు ఎలా వుంటాయన్నది ఆసక్తికరంగా మారింది. పోర్చుగల్‌లో నూతన ప్రభుత్వానిక సోషలిస్టు పార్టీ నాయకుడు ఆంటోనియో కోస్తా ప్రధానిగా నాయకత్వం వహించనున్నారు. మంగళవారం నాడు పార్లమెంట్‌లో విశ్వాస తీర్మానంపై చర్చ సందర్బంగా వెలుపల భారాల వ్యతిరేక ప్రదర్శన జరిగింది. ప్రభుత్వ రాజీనామా తమ విజయంగా వారు వర్ణించారు.
గతంలో విధించిన వేతన, పెన్షన్‌ కోతలు తదితర కార్మిక వ్యతిరేక చర్యలను వెనక్కు తీసుకోవాలని కమ్యూనిస్టు, వామపక్షాలు కోరుతున్నాయి. తాము అమలు జరిపిన పొదుపు చర్యల కారణంగా నాలుగు సంవత్సరాల నాటితో పోల్చితే దేశం మెరుగ్గా వుందని రాజీనామాచేసిన ప్రభుత్వ ఆర్ధిక మంత్రి చెప్పుకున్నారు. ప్రభుత్వ రాజీనామా గురించి గురువారం నాడు స్పీకర్‌ అధికారికంగా దేశాధ్యక్షుడికి నివేదిస్తారు. తరువాత నూతన ప్రభుత్వ ఏర్పాటుకు అధ్యక్షుడు చర్యలు తీసుకుంటారు.
